Tomiño, 18 de marzo de 2010.- Continúa este sábado, día 18 de marzo, a programación organizada pola Concellaría de Cultura, Educación e Participación Veciñal que dirixe Jesús Castiñeira, dedicada ao teatro durante todo o mes, con producións galegas de renome e que ofrece cada sábado unha proposta teatral de calidade.

O ciclo abriuse o día 6 coa obra “Un morto moi vivo”, a cargo de A Contrabutaca Produccións conseguindo un cheo absoluto con máis de 350 persoas. O éxito repetiuse o pasado sábado con coa compañía Fulano, Mengano e Citano e a súa proposta “Nunca menos”, que congregou a máis de 400 persoas.

A programación, organizada coa colaboración da Escola Municipal de Teatro e Danza e a Federación Terramiño, continúa este sábado con Cándido Pazó do grupo Abrapalabra, que subirá ao escenario coa obra “Historias Tricolores, ou de como aqueles animaliños proclamaron a República”. Nesta obra Cándido Pazó combina a súa experiencia como actor, autor e director teatral coa súa longa traxectoria como contador de historias nunha interesante proposta que ben podería definirse como un espectáculo de narración escénica para teatro.
Trátase dunha función dinámica, áxil e directa a medio camiño entre o monólogo cómico e o conto de taberna, pero cunha posta en escena propia dunha montaxe teatral moi coidada e cunhas boas doses de humor.

Pechará o mes de teatro o día 27, Máscara Produccións con “Por diante...e por detrás”. Todas as actuacións teñen lugar no Auditorio Municipal de Goián a partir das nove da noite.